1975年两月。春节要到了，天更加阴冷了。
阿青在姆妈关照下头乖乖交穿上棉毛衫裤，假领头，绒线衫，绒线裤，老棉鞋，老棉袄跟罩衫。罩衫外头还套了两只袖套来保暖跟防龌龊。假领头是阿姐穿旧的，酱红色绒线衫是阿婆结的。阿婆的一只手指头伐好伸直，伊还是勒热天格辰光拨伊最宝贝的外孙囡阿青结了一件流行的辫子花样绒线衫。阿青穿的格件罩衫是去年过年格辰光姆妈自家帮伊做的。今年阿青晓得姆妈又会得拨伊跟阿姐一人做一件新罩衫。
老棉袄是好几年前趁舅妈乡下头的亲眷叫蔡婆的来上海白相格辰光帮忙翻咯。
迭个蔡婆一双小脚，人生的矮墩墩，福笃笃，头发盘成一个小揪揪，黑颜色格斜襟大衫上插了针线，立了两只骨牌凳跟问隔壁头邻居借来格木板拼凑起来的工作台前头做起生活来。有格辰光蔡婆还会哼几句，阿青记得伊唱格：“地上跑跑，隆格里格隆格隆。”大概是唱关于啥格鸡啊鸭子啥的。后来阿青就背后头叫蔡婆“地上跑跑”了。
过年前格辰光是姆妈一年当中最忙格了。
先要问隔壁邻居借石磨，再去粮店里买糯米来叫爸爸奈糯米加水磨成米浆。阿青了海爸爸磨格辰光负责奈糯米一小把一小把摆进石磨当中洞洞眼里去。捏伐老落了外头的糯米拔姆妈看见了要哇啦哇啦叫了：“伐要来瞎白相，侬看米裁拔侬浪费脱。” 爸爸倒是蛮好，笑笑格讲：“阿拉阿青晓得帮忙做事体了。”姆妈一面讲：“还做事体来，帮倒忙偶。”一面到阳台上去看伊晾了竹竿上的风鸡，腊肉，黄鱼鲞。
阿青看牢爸爸奈盛了米浆格白布袋吊到竹竿上去，等袋袋里格水滴光以后就变成糯米粉拨姆妈包肉汤团用。阿青伐大欢喜吃糯米团，吃上去好像有点苦苦交，姆妈跟阿姐倒是老欢喜吃格。
阿姐现在勒嗨厨房间里炒长生果，摆了粗盐格长生果炒起来交关吃力，格老阿姐眉头皱了老吃力格样子。“阿姐，让我吃一颗看看好了伐。”阿青眼睛盯了有点发灰格盐跟长生果讲。“只晓得吃，我炒了吃阿吃力煞了，现在调侬来炒了。”阿姐比阿青大3岁，平常辰光伐大搭阿青白相，讲起闲话来老有权威格，阿青伐敢伐听伊，弄的伐好伊就要到姆妈格得去告状，格老只好乖乖交奈过镬锵刀炒起来。炒好长生果再奈热天介留下来格西瓜子炒炒，奈隔壁头大中拉姆妈送格一点黑龙江香瓜子炒炒。阿青记得隔壁新搬来的教授的老婆眼睛老小的，大家裁叫伊黑龙江香瓜子，阿青一开头以为伊是黑龙江人，还戆噱噱的去问伊，结果拨伊翻了一只白眼。
爸爸走到厨房间来奈砧板跟菜刀要切年糕片勒。阿青奈镬锵刀硬窝到阿姐手里，又去帮爸爸掰年糕条了。格个阿青欢喜做的，搭成功“井”字格年糕条冷冰冰格有点弹性，拉开来后爸爸奈菜刀切成一片片，格能家姆妈就好炒年糕了，吃伐光的用竹匾晒干这样一年四季裁有得吃。塌棵菜，青菜，韭芽肉丝炒年糕，阿青裁欢喜吃，还欢喜了海吃炒年糕格辰光摆一点醋，比较有味道。
年夜饭摆了台子高头了。
阿青跟爸爸还勒阳台浪厢放炮仗，为了省省点放，爸爸奈一串头格炮仗一只只拆下来拨阿青，再奈嘴巴里呼了格香烟拨伊，阿青奈烟头点着炮仗就吓得马上掼出去，碰着“老太婆出水”就浪费了格只炮仗。
“吃饭了，吃饭了。” 爸爸奈出一瓶香雪海来拨每个人倒一眼。阿青嗒嗒味道老甜格，就当伊无介事吃了老多。阿婆看了就马上讲：“快点吃点菜呢，侬要醉脱了。”姆妈一面勒厨房间里烧菜一面叫阿姐奈烧好格菜端出去。阿姐奈一只沙锅端到台子上，里厢有鸡汤，线粉，黄芽菜，蛋饺，旁边格小菜摆了一只红烧粉皮鱼头跟老多格大蒜头，还有炸春卷，熏鱼，沙拉，狮子头，冷盆牛肉，炒虾仁，炸猪排，炒年糕跟点心水果小圆子羹。
阿青还没等到吃水果羹就醉得悃着了，格一觉就睏到第二天年初一早上。醒过来看到被头浪姆妈拨伊摆勒格红花头新罩衫，阿青开心得唻张开嘴巴一笑，觉得嘴唇皮瞎痛，啥辰光因为吃瓜子长生果忒多了发出了火气。。。
