阿二头笑侃周立波

来源: 阿二于 2009-06-01 11:51:29 [档案] [博客] [旧帖] [给我悄悄话] 阅读数 : (3040 bytes)

本帖于 2009-06-05 18:22:41 时间, 由普通用户为人父编辑

周立波额海派清口，乐该文学城茶轩红起来之前阿拉就看过了，8过呒末看下去，为啥道理呒末看下去？嗬嗬，因为看勿下去来，伊长了特帅来，偶多看伊一眼心跳就加快一次，就等于偶额血液流动快一倍，就等于偶离心脏病高血压又走近了一步，所以，阿拉勿好对勿起自家额，索性勿看：）

周立波额样子，勿是像电影明星一样额帅。伊有伊额特点，侬看：伊额头发，头势清爽，油光光，格叫苍蝇打活特：）四方脸，两根眉毛呈八字形，嘴巴笑起来往下拐，有辰光还要舌头溻溻，肩革耸耸，一付贼特兮兮额样子，嘿嘿，格种样子是蛮能够吸引小姑娘额，当然，阿拉老早已经是老菜皮勒：））

本身哪，偶是勿打算再看额，结果，阿拉窝里厢额老金倒去看勒，还港蛮有劲额。格记勿对来，老金勿是上海宁，伊港好，偶再勿去看勿是输 8伊了吗？为了跟老金斗争到底，阿拉乖乖搬只小矮凳，坐乐该拿周立波看光：）

《笑侃三十年》吸引偶额，首先是伊额大量回忆。

格些六七十年代额生活场景对阿拉来港，是交关熟悉而亲切额。小辰光，炒麦粉，侬吃过伐？用筷子串起几根油条来，侬买过伐？刮香烟牌子，侬白相过伐？到邻居窝里厢排排坐看9寸电视机，侬去过伐？帮阿娘到小菜场里去排队，侬做过伐？8姆妈吃生活，侬尝过伐？：）

再后来，八十年代，邓丽君额靡靡之音，侬听过伐？小姑娘穿额红裙子，侬穿过伐？初中辰光，跟同学一道偷偷白相麻将牌，侬白相过伐？上海额舞厅，侬去过伐？翘伦、抽筋舞、霹雳舞，侬跳过伐？中国银行、华侨饭店门口额打桩模子，侬碰到过伐？各种黄牛，侬打过交道伐？：）

所有额格些，只有生活乐该上海滩额宁，才深有体会，有共鸣。周立波，就是立勒台高头帮阿拉集体回忆，拿阿拉一道带回到过去。生活，就是格能小市民，周立波就是因为唤起了广大老百姓额对过去美好回忆额怀念，所以才能捉牢观众额心！

侬晓得伐，周立波？侬额笑点老多额，偶笑勒眼泪水流出来了，差点面孔抽筋：）））

再港港周立波额语言特色。

上海闲话勿同于普通话，而且根本是一额是牛头，一额是马嘴，浑身勿搭界！：）大部分观众是上海宁，或者是听得懂上海闲话额。伊额幽默，侬有辰光只要稍微看伊坏兮兮额笑容，就可以体会到；伊额幽默，侬只要听伊港前半句，就能猜到后半句，格就叫心有灵犀：）伊额幽默，还要看伊模仿各种人物额腔调就会得笑。格就是周立波能够乐该上海红起来额关键。多少切口，才是阿拉生活中额口头语，而只有生活中额口头语才是一种语言额生命。从某种意义上港，周立波也是乐该保护上海方言，保护上海本土文化勿被流失做贡献额。

所以港，周立波，侬为上海宁扎台型噢！：）

周立波额学历并勿高，偶刮着伊身上还有点白相宁额味道。伊因为滑头，所以才能14岁就进入滑稽团；也因为滑头，才能够打瞎了丈人老头额眼睛还花到比伊大6岁额老婆；还因为滑头，伊还可以下海经商，欠了债还能够翻身；因为滑头，伊乐该合适额辰光进场，拿大家全部套牢！格额，也是伊额本事！白相，白相到伊格分上，就叫白相了老转额！：）

周立波额窜红，虽然离勿开京剧演员关怀额包装跟商业炒作，但是，最主要额还是周立波额舞台魅力。就单单港，乐该台高头一嘎头港两额钟头还是相当要有功力额。港额语气要捉的牢观众，港额内容也要捉的牢。周立波跟小沈阳最大额勿同点，还乐该伊能够深入到生活各额幺伲角落，涉及额话题相当广泛，政治，时事，教育，经济，文艺，体育，而每一额例子，伊总归要讽刺一下，批评社会，带点批判现实主义，格就相当难能可贵！小沈阳，最多是生活中额笑话，伊额调侃广度跟高度远远勿及周立波。现在社会，还能有啥宁敢拿国家领导宁开刷？周立波做到了！

从格点港，周立波，侬是只模子！