 |
197x年两月。春节要到了，天更加冷了。阿青勒嗨姆妈格关照下头乖乖交穿上棉毛衫裤，假领头，绒线衫，绒线裤，老棉鞋，老棉袄跟罩衫。罩衫外头还套了两只袖套来 保暖跟防龌龊。假领头是阿姐穿旧格，酱红色格绒线衫是阿婆结格。阿婆格一只手节头伐好伸直，伊还是勒热天格辰光拨伊最宝贝格外孙囡阿青结了一件流行格辫子 花样绒线衫。老棉袄是好几年前趁舅妈乡下头格亲眷叫蔡婆格来上海白相格辰光帮忙翻格。迭个蔡婆一双小脚，人生的矮墩墩，福笃笃，头发盘成一个小揪揪，黑颜 色格斜襟大衫上插了针线，立了两只骨牌凳跟问隔壁邻居借来格木板拼凑起来格工作台前头做起生活来。有格辰光蔡婆还会哼几句，阿青记得伊唱格：“地上跑跑， 隆格里格隆格隆。”大概是唱关于啥格鸡老鸭子老啥格。后来阿青就背后头叫蔡婆“地上跑跑”了。阿青穿格格件罩衫是去年过年格辰光姆妈自家帮伊做格。今年阿 青晓得姆妈又会得拨伊跟阿姐一人做一件新罩衫。过年前格辰光是姆妈一年当中最忙格了。先要问隔壁邻居借石磨，再去粮店里买糯米来叫爸爸奈糯米加水磨成米 浆。阿青勒海爸爸磨格辰光负责奈糯米一小把一小把格摆进石磨当中格洞洞眼里去。捏伐老落了外头的糯米拔姆妈看见了要哇啦哇啦叫了：“伐要来瞎白相，侬看米 裁拔侬浪费脱。”爸爸倒是蛮好，笑笑格讲：“阿拉阿青晓得帮忙做事体了。”姆妈一面讲：“还做事体来，帮倒忙偶。”一面到阳台上去看伊晾了竹竿上格风鸡， 腊肉，黄鱼鲞。格点东西是托人开后门弄来格。阿青格阿婆是做媒高手，伊奈卖肉格小周介绍拔卖鱼格小路，还居然拨伊成功了，格能介一来两个人裁要谢谢阿婆， 格个人情就用手里厢格鱼跟肉来还了。当然阿婆跟姆妈过年还要送拔伊拉两个人跟伊拉格小组长电影票，年历片拉。阿青看牢爸爸奈盛了米浆格白布袋吊到竹竿浪 去，等袋袋里格水滴光以后就变成糯米粉拨姆妈包肉汤团用。阿青伐大欢喜吃糯米团，吃上去好像有点苦苦交，姆妈跟阿姐倒是老欢喜吃格。阿姐现在勒嗨厨房间里 炒长生果，摆了粗盐格长生果炒起来交关吃力，格老阿姐眉头皱了嗨老吃力格样子。“阿姐，让我吃一颗看看好了伐。”阿青眼睛盯了有点发灰格盐跟长生果讲。 “我炒了吃阿吃力煞了，现在调侬来炒了。”阿姐比阿青大8岁，平常辰光伐大搭阿青白相，讲起闲话来老有权威格，阿青伐敢伐听伊，弄的伐好伊就要到姆妈格得 去告状，格老只好乖乖交奈过镬锵刀炒起来。炒好长生果再奈热天介留下来格西瓜子炒炒，奈隔壁头大中拉姆妈送格一点黑龙江香瓜子炒炒。爸爸走到厨房间来奈砧 板跟菜刀要切年糕片勒。阿青奈镬锵刀硬窝到阿姐手里，又去帮爸爸掰年糕条了。格个阿青欢喜做的，搭成功“井”字格年糕条冷冰冰格有点弹性，拉开来后爸爸奈 菜刀切成一片片，格能家姆妈就好炒年糕了，像塌棵菜，青菜，韭芽肉丝炒年糕。阿青欢喜勒嗨吃炒年糕格辰光摆一点醋，比较有味道。
年 夜饭摆了台子高头了。阿青跟爸爸还了嗨阳台浪厢放炮仗，为了省省点放，爸爸奈一串头格炮仗一只只拆下来拨阿青，再奈嘴巴里呼了嗨格香烟拨伊，阿青奈烟头点 着炮仗就吓得马上掼出去。“吃饭了，吃饭了。” 爸爸奈出一瓶香雪海来拨每个人倒一眼。阿青嗒嗒味道老甜格，就当伊无介事吃了老多。阿婆看了嗨就马上讲：“快点吃点菜呢，侬要醉脱了。”姆妈一面了厨房间 里烧菜一面叫阿姐奈烧好格菜端出去。阿姐奈一只沙锅端到台子上，里厢有鸡汤，线粉，黄芽菜，蛋饺，旁边格小菜摆了一只红烧粉皮鱼头，跟老多格大蒜头，还有 炸春卷，熏鱼，冷盆牛肉，炒虾仁，炸猪排，炒年糕跟点心水果小圆子羹。阿青还没等到吃水果羹就醉得悃着了，格一悃就悃到第二天年初一早上。醒过来看到 被头浪姆妈拨伊摆了红花头格新罩衫，开心格张开嘴巴一笑，觉得啥辰光因为吃瓜子，长生果塌多了发出了火气。
以次文来怀念那日渐消失的上海闲话
选择“Disable on www.wenxuecity.com”
选择“don't run on pages on this domain”
