搿两日搭一个70后辣一道吃子一顿饭，迭个阿弟比我小脱廿六岁，辣辣一家中日合资个同行个公司里搞营销，其实我老早就认得伊了，一直唔没好好叫吹牛皮，迭 趟吃饭，当子伊拉公司个中方总经理个面，无天野地个吹子起来，讲起15年前头，刚刚从日本留学回来，到公司应聘、面试、上班，一路讲过来，我越听越有味 道，邪气发噱，今朝写出来大家看看，搿题目就叫“日本海归就业记”。
1997年，迭家中日合资公司还结辣辣筹建当中，搿阿弟看到公司个招聘广告，按照广告浪个电话号头，打子过去，对方接电话个人事部长姓茅，后来到公司上班 之后，慢慢叫晓得迭个部长个绰号叫“茅估估”。茅部长辣辣电话里问阿弟阿会日语，阿弟回答伊辣辣日本留学子四年，刚刚回来，日语唔没问题。“搿没侬到阿拉 公司来面试，乃留学个资料一道带来。”“搿没捺公司那能走法？”阿弟问茅部长。“侬勿是刚刚走日本回来吗？那能介戆个啦！一眼噱头阿唔没个，拉部差头勿是 侪解决了吗？”，阿弟一记头闷脱。
按照约定个辰光，阿弟到公司先碰头茅部长，边浪坐子个日本人，毛六十岁，西装笔挺，讲闲话也老乐开个，日本人用日语问子几个问题，看过子阿弟个资料，接下 来茅部长用上海闲话问阿弟，对工资收入有啥个要求，阿弟想子一想讲：“一个月有五千块，差勿多了。”“喔哟，派派还是日本留学生唻，也不过迭眼要求，辣辣 阿拉公司里做，迭眼工资算啥个花头啦？介狗屄倒糟个。”阿弟一听，迭家公司勿推板末，“侬回去等通知伐，阿拉公司决定之后会通知侬个。”茅部长一刮两响， 阿弟又拉子一部差头回去了，一来一回，差头铜钿搞落脱一百多块。
阿弟回去等子好几天，唔没茅部长个回音。阿弟只好另外寻路子了，到一家日本人个化妆品公司应聘；倒也谈来蛮好，也是叫阿弟回去等通知。唔没 想着，隔手迭个茅部长电话来了，讲公司个日本人对阿弟印象蛮好个，决定录用，叫阿弟第二天就去公司报到。阿弟又想子一想，回答茅部长：“侬介几天唔没回 音，人家日本人个一家化妆品公司录用我了，那能办呢。”“哎，侬那能介拎勿清个啦？阿拉公司老正规个，侬当子录取一个人介便当个啊？侬跟牢迭个日本人做下 去，勿要忒好哦！我随便侬，要末明朝来报到，要末阿拉另外招人，想进阿拉公司个人勿要忒多哦。”，阿弟闷脱。
阿弟开始上班，公司还辣辣筹建，阿弟开始跟牢迭个日本师傅，营销浪暂时也唔啥事体。阿弟个日本师傅叫“神木”，神木先生一介头辣辣上海，唔没啥事体，三天 两头拖子阿弟去酒吧，“搿段辰光乃上海个酒吧侪白相过了，酒吧个老板，老板娘侪认得我了……”“神木先生当时已经59岁，日本总部派伊到上海来，伊勿要忒 实惠哦，乃两份工资，搿辰光个上海，酒吧开销比日本勿晓得便宜多少，搿老跑街先生乃我当导游派用场，不过凭良心讲，搿几个号头，乃我一生一世个酒吧侪白相 忒了。”“搭伊吹吹牛皮，学着勿少公司里个专业知识，勿然介后手来我也蛮难开展工作个。”阿弟迭能讲。“神木先生回去之后，我每趟到日本出差，总归要去望 望伊，带眼伊欢喜个中国茶叶拨伊。”阿弟待师傅勿推板。
辣辣公司做满子一个月，发工资个日脚，阿弟到银行里去拉卡，一看卡浪厢个数字，厥倒！卡浪只打进来一千六百块！隔手阿弟就寻茅部长讲筋头： “茅部长，侬勿是讲拨我一个号头五千块工资个末？那能工资卡浪只有一千六百块？”想勿到茅部长笃悠悠个回答：“阿弟，侬勿要搞错，公司还辣辣筹建，侬就想 乃五千块工资？侬当老板是戆大？世界天浪有介好个事体？再讲侬搞营销个，现在又唔啥事体，天天辣辣白相，等到公司开工之后，工资就会涨上去个，侬辣辣日本 几年，白白里登个啊？”，阿弟彻底昏倒。“搭茅部长争伐，两个人已经熟了，弄勿好两个人白板对煞。（最噱个是阿弟用普通话讲个：白板对死。）”，“想想也 有道理，辣辣公司还唔没投产个迭段辰光里，跟牢子神木先生，学点本事，譬如参加培训。再讲伊歇辰光走日本刚刚回来，手浪厢还蛮宽裕个，也唔没女朋友，搿能 就辣辣公司做子下去，一做就做到子现在，眼睛一霎十五年了。”
搿辰光我熬勿牢开口问了，迭个茅部长现在辣辣做啥？坐辣旁边个总经理听得笑煞脱了，接口讲：“茅估估退休子两年了，勿要讲哦，伊第一批招进来个迭眼人，倒 是确实勿错个，现在侪辣辣岗位浪。阿弟现在是营业部个头，整个公司日本人只挺下来两个人了，其他侪是中国人了。”，我又熬勿牢搭阿弟讲：“阿弟，下趟我请 侬吃饭，继续听侬吹，听侬开大道，好好叫比听周立波个‘海派清口’来得扎劲。”，“老法师，勿好意思哦，辣侬老法师面前，我是‘关公面前舞扦脚刀’啊！” 阿弟还来得个谦虚，我立起来搭伊碰脱子一小杯红酒……
选择“Disable on www.wenxuecity.com”
选择“don't run on pages on this domain”
